飲水

飲水從來都是我一個弱項，因為好怕去洗手間，我知道飲水對身體好，但係始終都唔係好堅持到，天父，求祢幫助我，學習飲多啲水，以致令身體健康啲，可以為祢做更多事，而且我哋既身體係聖靈既殿，如果我哋唔好好地保守我哋既身體，咪係唔保護祢既殿，又令祢擔憂囉，所以求祢幫我能夠好好地堅持學習多飲水。

胃痛

咁大個女第一次胃痛得咁勁，痛到要提早收工，差啲想去睇急症，好彩依家好啲喇，感激祢聽女兒微聲既禱告呼求，祢醫治咗我，真係好多謝祢呀天父。

相知相交

今日教會有相知相交聚會，雖然出席既人數唔多，特別係今朝早去輕鬆遊既都只係有三個人，但係我哋都好開心，好享受，下晝返教會多返啲人，我哋又有一齊相交，互相認識既機會，實在感恩，藉此我哋可以彼此加深認識及了解，我想，我哋唔單止要同弟兄姊妹互相加深認識，重要既係，對祢要多多既認識，因為無祢，我哋既人生就變得無意義，係祢令我哋既人生變得精彩，好多謝祢，願祢幫助我多多既認識祢，阿們！

無語言阻隔

天父，今晚喺祈禱會同om姐、wy姐一齊祈禱，佢哋竟然話用普通話祈禱呀！雖然我都識既，但係又唔識得晒喎，所以就唔敢用，都係用返廣東話，he，雖然我哋用咗唔同既語言向祢祈禱，但係你係無語言阻隔既神，無論我哋用咩語言向祢祈禱祢都一樣會聽，真係好多謝祢肯聽我哋祈禱，聽我哋向祢傾訴。

點解？

通常人見到人既時候，打招呼都係會講：早晨！你好！hi！等等...
但係依家好多人見到一啲不定時咁喺屋企或者喺街度出現既人既時候，佢哋同你打招呼既對白通常會係：你咁得閒既？唔駛做呀？
唔知你聽到啲咁既問候語會有咩反應，我通常都會唔開心，我諗咁都好正常啫，我又唔係真係無返工，只係成日隨街逛，只係工作既時間唔定時啫，而且你哋都唔係真係咁了解情況，點解要咁樣講野喎，你哋唔覺得好傷人架咩？你哋唔覺得你哋啲仔女都會學埋你哋咁講野架咩？
我聽到呢句說話既時候真係好唔開心，不過同時個腦有句說話彈咗出嚟，祢話：伸冤在祢，祢必報應。
係，有時身邊既人真係唔係好明我哋既情況，亦都唔係好理我哋既感受，但祢了解我哋，祢明白我哋既情況，祢叫我哋可以嚟到祢面前同祢傾訴，天父多謝祢，多謝祢明白我哋，多謝祢喺我哋開心同唔開心既時候都陪住我哋，使我哋得到安慰，好多謝祢。

今年最後一個月喇

話咁快今日已經係十二月，亦即係2009年既最後一個月喇，咁快又一年喇，又係時間要回顧一下今年既大事小事，數算一下祢喺我哋身上既恩典喇，除咗咁，仲要繼續願祢帶領我哋走過未來既日子。

懇親日

尋日(29/11)係懇親主日，本來想請mama返埋主日講道既，但係又唔成功囉，天父，係咪我禱告唔夠懇切所以咁呢？
唉，其實我對佢會出現既機會既信心真係一半一半架咋，係未唔係幾好呢？我都知架喇！我諗我都要好好操練下祈禱既功課先得喇！

推辭

天父，我今日推辭咗喺冬令會事奉喇，因為真係好驚，好擔心，而且仲知道熟識既哥哥姐姐都唔會出現，於是更加驚，所以決定推辭，或者可能呢個唔係祢既心意，但係我真係真係好驚，所以....
或者祢會責怪我對祢唔夠信心，信唔過祢會幫我度過。　　
又或者，祢會責怪我唔珍惜祢俾我學習事奉既機會。
呢一切一切都係我信心軟弱既緣故。
天父，求祢憐憫，憐憫我既軟弱，憐憫我信心既不足...........

渴求

今日喺公司見到兩個弟兄，其中一個應該係初信，另一個應該信咗一段時間，聽到佢哋既對話，個心突然"叮"咗一聲，個初信既弟兄對祢既渴求真係好深，佢問個信得比較耐既弟兄：點先可以有祢既同在呀？個弟兄就答佢，咁你就要靈修囉，讀聖經囉，你親近神，神咪親近你囉！
嘩！好大提醒呀！
我哋真係要好好咁親近祢先得呀！如果唔係，無咗祢，我哋點過日子呀？條路咁難行，無祢傍住點行得過呀？
仲有，祢話我哋唔可以掉棄起初既愛心，冷卻起初對祢既熱愛，我哋要不斷既追求更深認識祢，但我知，我哋既心被世俗既野迷惑咗，所以對祢冷淡咗，求祢原諒我，又幫助重新努力咁追求祢。阿們。

可唔可以.......

天父祢真係聽祈禱架，我向祢求咗啲野，祢就回應我喇！
我今晚睇電郵睇到喇！
不過呢，同我求嗰樣好似有啲出入喎！
我向祢求嗰樣野好似唔係呢樣喎！
雖然我都覺得好有機會係呢樣，不過其實我想試另一樣喎！
我收到呢個消息好驚，唔知答唔答應好，因為真係好驚好驚，做音响組喎，錄唔到音，按錯制點算？令會喎，好大件事架，真係非常非常之驚，仲可能要上台試咪架嘛，諗起嗰幾級樓梯就非常驚喇，點算好呢？可唔可以俾第二個崗位我呀...........

傾心事

天父，多謝祢俾我哋有禱告既權利，俾我哋可以用禱告嚟同祢傾計，不過呢，我有時真係唔知要點祈禱，有時又好唔專心，腦裏面有好多好多無謂野閃過，令到我真係唔可以好專心咁同祢傾計，真係好對唔住呀 :p所以突然有個念頭，我要將想同祢講既野寫出嚟，或者咁樣可以專心啲，又或者話，可以俾自己知道自己同祢講過啲咩，不過其實咁樣算唔算祈禱架？真係唔知喎！不過我諗祢咁犀利，一定會聽既，hehe！
今日有機會同小堅姊妹喺電話傾心事，真係好好，好耐無試過咁傾法，一傾就個幾鐘，真係勁！我哋雖然成日都喺教會見到，但係要傾計都真係無咩時間，趕住聚會嘛，平時佢哋又會好忙好忙喎，所以呢，呢啲機會真係好難得！雖然依家有時都會寫信俾佢(he，架陣仲要寫信聯絡，真係好原始，不過真係好享受！所以都決定要寫信俾祢傾心事，hehe！)
好多謝祢俾我哋有弟兄姊妹一齊走天路，雖然祢喺我哋每個人既身上都有唔同既心意，我哋亦都唔一定會明白祢究竟喺佢哋身上有咩計劃，但我哋知道，祢要我哋互相扶持，互相記念，呢個係祢喺每個屬祢既兒女身上既心意，求祢幫助我哋，叫我哋喺祢裏面學懂互相關顧既功課，學習祢愛人既榜樣，去愛身邊既人。阿們！